Навоий вилояти Бандлик Бош бошқармаси
» » Мажбурий меҳнатга йўл қўйган масъуллар жавобгарликка тортилди

Мажбурий меҳнатга йўл қўйган масъуллар жавобгарликка тортилди

Муаллиф: upr_trud
Мажбурий меҳнатга йўл қўйган масъуллар жавобгарликка тортилди
Бандлик ва меҳнат муносабатлари вазирлигининг Давлат меҳнат инспекцияси томонидан мажбурий меҳнатга қарши кураш ва меҳнат ҳуқуқларини муҳофаза қилиш ишлари давом эттириляпти.

Инспекция келиб тушаётган мурожаатларни диққат билан ўрганмоқда ва айбдор масъулларни жаримага тортяпти. Бунда Давлат меҳнат инспекциясининг 1176 қисқа рақамлари, dmi.mehnat.uz сайти ва mehnathuquqbot Телеграм боти орқали келиб тушаётган мурожаатлар ҳамда ҳуқуқ ҳимоячилари билан олиб борилаётган ҳамкорлик ишлари муҳим восита бўлиб хизмат қилмоқда.

Хусусан, мажбурий меҳнатга жалб қилиш ҳолатлари, меҳнат ҳуқуқи ва меҳнат шароитлари бўйича қонунчиликда белгиланган талабларни бузганлик юзасидан Инспекция ишчи гуруҳи томонидан олиб борилган сўнгги ўрганиш ишлари натижасида Хоразм, Фарғона, Наманган, Жиззах вилоятларида қонунбузарликлар аниқланди.

Масалан, Хоразм вилояти Қўшкўпир тумани Ободонлаштириш бошқармаси ходимларини мажбуран пахта теримига жалб этгани учун бошқарма бошлиғи, Хива шаҳар Халқ таълими бўлими мудираси томонидан “Ёшлик” жисмоний тарбия ва спорт жамиятига аъзолик бадали йиғиб олиш тўғрисида буйруқ чиқарилиб, бадал пули мактаб педагог ходимларидан талаб этилгани сабаб, бўлим мудирасига нисбатан Ўзбекистон Республикаси Маъмурий жавобгарлик тўғрисидаги кодекснинг 51-моддаси 1-қисмига биноан энг кам иш ҳақининг 30 баробари – 6.690.000 сўмдан жарима тайинланди.

Худди шу жарима қиймати Фарғона вилояти Фарғона тумани 22-сонли умумтаълим мактаби ўқитувчиларини уларнинг розилигисиз мажбуран мактабдан ташқари ҳудудларни ободонлаштириш ишларига жалб этгани учун мактаб директори, Наманган вилояти Ер-мулк давлат кадастри Тўрақўрғон филиали ходимларини мажбуран пахта теримига жалб қилган Ер-мулк кадастри Тўрақўрғон филиали раҳбари ҳамда Жиззах вилояти Пахтакор тумани Пенсия жамғармаси ходимларини пахта терими ишларига мажбуран жалб этгани учун жамғарма раҳбарига нисбатан ҳам қўлланилди.

Шунингдек, пахта терими пайтида теримчиларга етарли шарт-шароитлар яратилмагани, терим пуллари ўз вақтида берилмагани ва ходимларни мажбурий тарзда пахта теришга жалб этгани учун Жиззах вилоятидаги қатор мутасаддилар жавобгарликка тортилди.

Жумладан, теримчилар учун етарли шарт-шароит яратмаган ва терим пулларини ўз вақтида бермаган Ш.Рашидов тумани АТ “Халқ банки” бошқарувчиси, Мирзачўл тумани “Қахрамон Расул Ота” фермер хўжалиги раҳбарига нисбатан ЎзР МЖтКнинг 49-моддаси 1-қисми билан энг кам иш ҳақининг 10 баробари миқдорида жарима тайинлаш учун маъмурий баённомалар тақдим этилди.

Ходимларни мажбурий равишда теримга жалб этгани учун эса Жиззах шаҳар Ободонлаштириш бошқармаси раҳбари, Пахтакор тумани Молия бўлими бошлиғи, Пахтакор тумани АТ “Халқ банки” филиали бошкарувчиси, Арнасой туманидаги Ободонлаштириш бошқармаси, Сувоқава ДУК ва Тиббиёт бирлашмаси раҳбарлари МЖтКнинг 51-моддаси 1-қисмига асосан маъмурий жавобгарликка тортилди.

Эслатиб ўтамиз, Ўзбекистон Республикасида мажбурий меҳнатнинг ҳар қандай шакли қонунга хилофдир! Агар Сизни пахта терими ёки бошқа бирор ишга мажбурлашса ёки шундай ҳолатга дуч келсангиз, Давлат меҳнат инспекциясининг ишонч тармоқларига мурожаат қилинг!
Курилди: 31